“يا فهدنا يا سنا العز وسموّه.. يا سنا سلطان في نظرة عيونه”.. قصيدة للدكتور “نايف الجهني” مهداه إلى أمير تبوك

قصيدة للشاعر الدكتور نايف بن دخيل الله الجهني، مهداة إلى صاحب السمو الملكي الأمير فهد بن سلطان بن عبدالعزيز، تجسّد مشاعر الوفاء والاعتزاز، وتستحضر أثر القائد في الإنسان والمكان.
تقدّمها صدى تبوك.

يا أمير الخير قُوّه ثم قُوّه
زادك الرحمن من مدّه وعونه

تو ما زان الشمال وزان جوّه
من بعد ما غيثنا هلّت مزونه

تو قلبه بالحيا ينبض وتوّه
في شذا فرحة تبوك يعانقونه

ساقه اللي ما علت قوّته قوّه
المكوّن من بديع الخلق كونه

يوم برقه بشّر الريضان ضوّه
من بعد ما قيل ليه ابطت اهتونه

نوّك اللي كلّنا نفرح بنوّه
يزهر الورد ويميلن به غصونه

فهدنا رمز الشهامة والمروّه
في عيونه حطّنا داخل عيونه

عالي والمجد يعلو من علوّه
دون مجده تقصر الأمجاد دونه

بين فكره وأعظم الأفكار خُوّه
يُلهم بمعناه من يستلهمونه

كم لجم بالحق من قولٍ مشوّه
ومن فعوله تمدح اللي يمدحونه

إن صمت له هيبةٍ وإن فاض فوّه
في كلامه يبهر اللي يسمعونه

نسل حرٍ بيننا ما زال ضوّه
والمكارم ما قوت تكرم بدونه

يا فهدنا يا سنا العز وسموّه
يا سنا سلطان في نظرة عيونه

كم سقانا من عطاياه وحنوّه
والعظام نفوسهم دايم حنونه

هو شبيهه الجود والا الجود هوّه
هو هو الطيب في شكله ولونه

روّ عمره يا رفيع الشان روّه
واحفظ لبشت الفخر هامة متونه